Як у Беларусі будуць ацэньваць выкананне нарматываў дзяржаўных сацстандартаў у галіне транспарту, вызначыла Міністэрства транспарту і камунікацый. Адпаведная інструкцыя зацверджана пастановай ведамства ад 31 студзеня 2025 года нумар 6, паведамляе БЕЛТА са спасылкай на Нацыянальны прававы інтэрнэт-партал.
Размова ідзе пра наяўнасць пасажырскіх тэрміналаў на аўтобусных маршрутах, ахоп транспартным абслугоўваннем, абслугоўванне насельніцтва ў рамках гарадскіх перавозак і міжгародніх унутрыабласных аўтамабільных перавозак у рэгулярных зносінах.
Так, нарматыў наяўнасці пасажырскіх тэрміналаў - адзін-два на раён. Прадугледжаны 100-працэнтны ахоп транспартным абслугоўваннем (з улікам чыгуначнага і ўнутранага воднага транспарту ў навігацыйны перыяд) адміністрацыйных цэнтраў сельсаветаў пры абавязковым выкананні не менш як 16 рэйсаў, з 2026 года - не менш як 20 рэйсаў у тыдзень. Для аграгарадкоў з колькасцю насельніцтва больш за 1 тыс. чалавек - пры абавязковым выкананні не менш як 28 рэйсаў у тыдзень.
Зона ахопу населеных пунктаў з колькасцю насельніцтва ад 20 чалавек транспартным абслугоўваннем (з улікам чыгуначнага транспарту і ўнутранага воднага транспарту ў навігацыйны перыяд) вызначана да 3 км.
Нарматыў абслугоўвання насельніцтва ў рамках гарадскіх перавозак для гарадоў і гарадскіх пасёлкаў з колькасцю 10-30 тыс. чалавек - адзін аўтобус на 8 тыс. пасажыраў. Калі там пражывае ад 30 тыс. да 50 тыс. жыхароў - адзін аўтобус на 4 тыс. чалавек. Для гарадоў з насельніцтвам ад 50 тыс. да 250 тыс. чалавек прадугледжваецца адзін аўтобус (тралейбус, трамвай) на 2 тыс. чалавек, для гарадоў з насельніцтвам ад 250 тыс. да 1 млн чалавек - адзін аўтобус (тралейбус, трамвай) на 1,5 тыс. чалавек. Для Мінска нарматыў - адзін аўтобус (тралейбус, трамвай, вагон метрапалітэна) на 2 тыс. чалавек.
Што датычыцца маршрутаў міжгародніх унутрыабласных аўтамабільных перавозак у рэгулярных зносінах (з улікам чыгуначнага транспарту і ўнутранага воднага транспарту ў навігацыйны перыяд), то прадугледжаны штодзённа адзін абарот (два рэйсы) паміж раённым і абласным цэнтрамі.
Дзяржаўныя сацыяльныя стандарты па абслугоўванні насельніцтва рэспублікі з'яўляюцца абавязковымі для выкарыстання ў арганізацыях усіх форм уласнасці.
Для вынясення заключэння аб выкананні сацыяльнага стандарту на тэрытарыяльным узроўні неабходна параўнаць фактычна дасягнуты яго ўзровень, вызначаны ў адпаведнасці з інструкцыяй, з узроўнем устаноўленага сацыяльнага стандарту або з больш высокім узроўнем, зацверджаным рашэннямі вышэйшага мясцовага выканаўчага і распарадчага органа для кожнай адміністрацыйна-тэрытарыяльнай адзінкі з улікам яе спецыфікі і развіцця інфраструктуры.
Згодна з дакументам, сацыяльныя стандарты ўстанаўліваюць гарантаваны ўзровень транспартных паслуг, які дае магчымасць задаволіць асноўныя патрэбнасці насельніцтва ў перамяшчэнні. Ацэнка іх выканання дазволіць увесці аднастайны падыход пры аналізе работы па абслугоўванні насельніцтва ў адпаведнасці з нарматывамі сацыяльных стандартаў.
Дакумент уступае ў сілу з 7 мая.
