Выстаўка знаёміць з песеннымі фальклорнымі традыцыямі Гомельскай вобласці праз традыцыйную абраднасць лакальных мікрарэгіёнаў. Гэта і каляндарныя (калядныя, гуканне вясны, юр'еўскія, стрэльныя, русальныя, жніўныя), і вясельныя абрадавыя традыцыі.
У экспазіцыі - відэа і аўдыязапісы аўтэнтычных і аматарскіх фальклорных калектываў рэгіёна, тэксты песень, сучасныя рэканструкцыі традыцыйных строяў (комплексы адзення), прадметы абрадавай культуры і традыцыйнага побыту.
Дапаўняюць выстаўку выданні па традыцыйнай культуры Гомельскай вобласці, стэнды з фатаграфіямі фальклорных калектываў рэгіёна, якія захоўваюць песенную спадчыну, а таксама QR-коды са спасылкамі на старонкі сайта цэнтра народнай творчасці, дзе можна атрымаць дадатковыя звесткі па тэме экспазіцыі.