Два дні таму каманды ўжо сустракаліся ў Жлобіне і на радасць прысутным гледачам закінулі дзесяць шайбаў на дваіх - "Металург" атрымаў перамогу з лікам 6:4. Аднак гульня ў панядзелак не мела практычна нічога агульнага з суботнім градам галоў, супаў хіба што падагульняючы поспех гаспадароў лёду. "Стальным ваўкам" спатрэбілася толькі тры мінуты пасля стартавага ўкідвання, каб выйсці наперад, дакладны кідок нанёс Максім Лемяшэўскі. Наступных паражаючых атак давялося чакаць да другога перыяду: спачатку Цімафей Каўгарэня зраўнаваў лік, але даволі хутка Міхаіл Стафановіч у большасці зноў забяспечыў "Металургу" лідарства. Да завяршэння сустрэчы заставалася яшчэ паўгадзіны гульнявога часу, але лічбы на табло так і не змяніліся - 2:1 на карысць дзеючых чэмпіёнаў.
Гэта вікторыя стала для жлобінскага клуба трэцяй запар, настолькі працяглага паспяховага адрэзка ў гэтым сезоне хлопцы Дзмітрыя Краўчанкі яшчэ не дэманстравалі. Пераможная серыя дала магчымасць "ваўкам" падняцца на восьмае месца ў экстралізе, адставанне ад зоны плэй-оф складае чатыры ачкі. Раней у панядзелак гродзенскі "Нёман" у гасцях нанёс паражэнне салігорскаму "Шахцёру" (3:2), а "Гомель" таксама на выездзе разабраўся з "Лідай" (4:2).
28 лістапада ў чэмпіянаце краіны па хакеі таксама адбудуцца тры матчы. "Віцебск", які вярнуўся на першую пазіцыю ў табліцы, у Наваполацку сустрэнецца з "Хімікам", а "Брэст" прыме "Магілёў", абедзве гульні стартуюць у 19.00. На гадзіну пазней на лёд у Оршы выйдуць мясцовы "Лакаматыў" і сталічнае "Юнацтва".
