Для дыплома III ступені ў намінацыі «Лепшае аддзяленне дзіцяча-юнацкай спартыўнай школы» толькі рыхтуюць цвічок, а рабочы тэлефон дырэктара ўстановы Алы Дзяшчэня ўжо «разрываецца» ад званкоў.
– Віншуюць. Прыемна, – не хавае эмоцый суразмоўніца. – За апошнія пяць гадоў і не было такога, каб у абласным галіновым змаганні па выніках работы пераможцамі станавіліся такія невялікія райцэнтры, як наш. Калі на экране з’явіўся бягучы радок з роднай назвай, я зразумела: вось ён, поспех.
Ала Дзяшчэня запэўнівае: галоўная заслуга належыць шасці трэнерам аддзялення лёгкай атлетыкі. І ўвогуле кідальнік, скакун ці мнагаборац з Добруша – гэта ўжо брэнд.
– Аб гэтым ведаюць спартыўныя рэкруты па ўсёй краіне, – гаворыць трэнер-педагог Наталля Амеліна. – Толькі ў 2024 годзе мы перадалі ў вышэйшае звяно падрыхтоўкі трынаццаць узыходзячых зорачак спорта. Дванаццаць з іх – з нашага аддзялення.
Сёння ў Добрушскай раённай ДЮСШ займаюцца 237 юных лёгкаатлетаў. Дзеці з задавальненнем асвойваюць спартыўную хадзьбу, розныя віды бегу і кідання, скачкі ў даўжыню. Некаторыя робяць гэта для агульнага развіцця, іншыя – з мэтай стаць прафесійнымі спартсменамі і будучымі калегамі сваім педагогам.
– Кожныя старты, кожнае спаборніцтва – гэта жаданне скокнуць вышэй галавы, пераадолець не толькі саперніка, але і сябе самога, – кажа Наталля Амеліна. – Калі ў выхаванца гэта атрымліваецца, значыць, усе заняткі і старанні недарэмныя. Вось і сёння вялікая каманда ДЮСШ адстойвае гонар раёна на важных спаборніцтвах у Мінску. Дакладна ведаю: без гучных перамог Добрушчына не застанецца.
